6蛋都唔夠曼城下輪非勝不可
2025/06/24
尋日朝早世冠盃G組賽事，英超勁旅曼城以6比0大勝艾阿恩，提前鎖定出線資格。
曼城首仗2比0輕取韋達卡薩白蘭卡，今場對住弱旅艾阿恩大開殺戒，上半場由根度簡、卡迪奧艾捷維利建功、以及同艾寧夏蘭特入12碼領先3球，73分鐘根度簡攻入個人第2球，加上奧斯卡波比同卓基尾段入波，湊成6比0大勝。當卓基喺89分鐘射成6比0後，曼城球員都第1時間衝番去中場再開波，因為佢哋知道只要入多1球，最後一輪對祖雲達斯唔輸就可以首名出線，可惜最終事與願違。
同祖記爭首名避皇馬
祖雲達斯喺較早時間，4比1大勝韋達卡薩白蘭卡，目前同曼城一樣有6分，而且得失球差都係+8，不過「祖記」入球數字（9球）多曼城1球，所以下輪兩隊交手如果打和，祖雲達斯就會以較多入球首名出線。要知道G組次名出線球隊，喺16強會對H組首名，預測會係皇家馬德里，所以曼城如果想避開勁敵，最後一輪對「祖記」係非勝不可。