曼聯第一擊攻力冇起色 射門被截胡根夏嬲到爆
2025/07/21
曼聯新球季正式展開！正喺瑞典集訓嘅「紅魔鬼」同列斯聯進行首場熱身賽，馬菲奧斯根夏同迪亞高李安兩名新兵擔正，但係球隊進攻表現未見起色，踢成0比0之餘，仲見到根夏同海倫兩名前鋒扯火埋怨隊友，不過領隊魯賓艾摩廉就話滿意今次練兵成效。
今場係曼聯首場熱身賽，球員未上力係意料中事，以6,250萬鎊轉會費加盟嘅根夏，今場擔任「10號位」表現相當落力，多次博到對手犯規，但入肉攻勢唔多，球隊上半場9射只得1次中龍，包括出現喺42分鐘嘅黃金機會，阿密特迪亞路回傳，根夏本來可以順勢射門，但小將奧比馬田爭食，高難度轉身抽射斜出，激到根夏即場大發脾氣。
下半場曼聯換晒11個球員，雖然繼續控制大局，但進攻依然有心無力，海倫亦曾因達洛治傳球太慢而「爆粗」大鬧，結果曼聯全場19次射門得4次中目標，以0比0悶和完場。「紅魔鬼」完成瑞典訓練營返英，之後將進行美國之旅，下場賽事係27日對韋斯咸。
艾摩廉死撐話滿意
雖然未能入波，但領隊艾摩廉仍然讚揚根夏表現：「我哋中路缺乏速度，但仍然製造到機會，根夏顯示出球隊需要嘅元素，佢可以喺前場攞波，然後展開侵略性進攻，雖然同般奴費南迪斯嘅合作仲未撻着，但今場只係開始，我哋會慢慢建立聯繫同提升質素。」