般費起孖曼聯扑錘 艾摩廉收貨讚海倫夠搏
2025/07/28
|
|
|
|
||||||||||||||||
曼聯喺尋日早上「美國之旅」季前熱身賽首站，憑隊長般奴費南迪斯射入2球，以2比1擊敗「錘仔幫」韋斯咸，助曼聯打開勝利之門，賽後領隊魯賓艾摩廉表示，滿意球隊表現。
曼聯上場熱身賽僅和列斯聯0比0，今仗表現有明顯改善，喺比賽初段般奴費南迪斯主射12碼打開紀錄。換邊後，曼聯中場明奈助攻畀般費射入靚波領先2球。戰至63分鐘，韋斯咸憑查洛保雲入波追番1球，跟住曼聯主帥魯賓艾摩廉一次過換10位球員試陣，但日前新加盟前鋒麥比奧莫並冇上陣，最終曼聯維持2比1勝果，將於周四早上「美國之旅」第2站對般尼茅夫。
值得一提，嚟緊新一季英超將會喺中場休息加插訪問環節，並可以短暫拍攝更衣室情況，賽會利用今次熱身賽預演，艾摩廉喺上半場結束後接受訪問：「我哋防守穩健，攻守轉換亦做得非常好，我好欣賞球員嘅努力。」而賽後艾摩廉點名大讚前鋒海倫夠晒搏命，佢仲透露新兵麥比奧莫可能要等到8月4日對愛華頓先至披甲。
沿用相同陣容鬥阿仙奴
美國傳媒指曼聯今場正選球員狀態出色，魯賓艾摩廉應該會以呢個陣容迎戰首輪英超對阿仙奴。「紅魔鬼」今仗排出3421陣式，由門將比恩迪亞把關，3位中堅分別為艾登希雲、馬菲斯迪歷特、約羅，中場有阿密特迪亞路、文路爾烏加迪、明奈、柏德列多古，2位進攻中場般奴費南迪斯、馬菲奧斯根夏輔助單箭頭海倫。
賣唔出！「掛牌3翼」或留隊
曼聯今夏「清貨」行動緩慢，主要掛牌出售球員之中，只有拉舒福特已轉投巴塞隆拿，領隊魯賓艾摩廉似乎打定輸數，指「掛牌3翼」阿歷真度加拿祖（圖左）、查頓辛祖及安東尼馬菲奧斯下季可能留隊。
曼聯已飛去美國踢季前熱身賽，3位翼鋒加拿祖、辛祖及安東尼都冇份，艾摩廉表示：「當去到某一個時間，佢哋可能會重新加入球隊訓練，畢竟佢哋仍然係曼聯球員，如果球會收唔到合適報價，我已經準備好接納佢哋。」
盛傳拜仁慕尼黑有意簽阿歷真度加拿祖，祖雲達斯睇中查頓辛祖，貝迪斯希望繼續借用安東尼，不過仍未傾掂數。