雙蛋贈曼城熱刺2連勝
2025/08/24
尋晚英超早場，曼城主場0比2不敵「剋星」熱刺。「藍月亮」今場表現未如理想，上半場兩度被攻破大門，最終熱刺作客「破城」全取3分，近4次對曼城贏3場。
雙方喺比賽初段展開攻防戰，直至35分鐘，上場省兩球靚波嘅李察利臣成功破越位，右路傳中畀比蘭莊臣門前輕鬆射入，熱刺領先1比0。完半場前曼城門將占士查科特嚴重犯錯，門前傳送時被李察利臣截下，雖然占士查科特撲走李察利臣腳下球，但被祖奧包連夏從旁「執死雞」勁射破網，熱刺半場領先2比0。
下半場曼城全軍出擊，先後換入貝拿度施華及養傷多時嘅洛迪卡斯簡迪，加強進攻力度，但未能攻破熱刺防線，最終熱刺贏2比0完場，開季2連勝。
車仔開齋祖奧柏度搶鏡
至於周六凌晨上演嘅英超「倫敦打吡」，車路士喺先失1球情況下，作客以5比1反勝韋斯咸，打開今季聯賽勝利之門，新加盟前鋒祖奧柏度入1球及2次助攻，演出光芒四射，呢位23歲巴西國腳自7月初由白禮頓加盟車路士之後，踢5場正式賽事創造6球，包括踢3場世冠盃入3球，踢兩場英超入1球及2次助攻，迅速奠定進攻核心地位。