古廉權樂做塞班古
|
|
|
|
||||||||||||||||
島國開荒 Happy教波
正當香港球圈大搞「鳳凰計劃」振興足運之際，前香港隊教練「大馬古」古廉權及其港產教練團，近年卻在太平洋「陽光與海灘」旅遊勝地塞班島另起爐灶，在該島國做其開荒牛教波，經過一年半經營，上月初更組成北馬里亞納群島代表隊出戰亞洲挑戰盃。「阿古」早前帶着一身海水味回港小休，開口埋口都係「塞班足球」同「我班細路」，睇嚟佢個新外號應該叫做「塞班古」！
古廉權後生年代係馬來西亞國腳，以外援身份來港踢過加山同精工，掛靴後教過香港隊、快譯通同晨曦，更係晨曦五冠王嘅教練，喺香港同馬拉球圈都吃得開，現年62歲嘅佢仲好有魄力，年半前率領車路士足校教練王國斌、鄧志明同女足教練姚嘉慧勇闖塞班島，一切由零開始，同香港嘅「鳳凰計劃」相比，佢哋呢個或者只係「鵪鶉計劃」，但教學雙方都好Happy。
踢波教波都係天堂
「今次我哋過去教波真係好多巧合，喺塞班島有好多生意嘅香港企業家陳守仁家族，陳守仁之子Jerry Tan本身係球迷，不時踢衞生波，後來仲做埋塞班島足總會長，而佢同車路士足校都好熱心做善事，所以我哋好投契，傾吓傾吓，結果就由我帶隊去咗塞班島做開荒牛。」
阿古雖然身經百戰，但要佢搞咁大壇嘢一時之間不知從何入手：「莫講話踢波要用『掃把腳』，塞班人最初連一場波係點踢都唔係好識，不過島國人勝在夠熱情，生活單純，學嘢又快，我哋好快就成立咗代表隊、各級梯隊同女子隊，仲搞埋聯賽，不設外援限制，我哋幾個教練間中都有落場玩吓。」
阿古仲話，去塞班島教波嘅最大樂趣，就係畀你盡情發揮：「島民對成績冇期望，絕對唔會有壓力，亦肯定冇『老細足球』，最難得係島上嘅草地足球場可以畀你無限次使用，想點練就點練。塞班島嘅生活無疑係幾枯燥，但對於鍾意踢波同教波嘅人嚟講，呢度就係天堂。」
塞班島（Saipan）資多啲
‧美國島嶼地區北馬里亞納群島（Northern Mariana Islands）首府，群島嘅九成人口居住此島
‧面積120平方公里，人口約有63,000，其中一萬多為華人
‧戰前以糖業及漁業為主，戰後發展成為西太平洋嘅旅遊勝地