Football

晨曦大門靠晒「王子兄弟」

2013/07/05

各位球迷注意!新一季甲組聯賽中除咗「威廉、康廉」兄弟、「國強、國輝」兄弟同「至孝、健f晃」兄弟外,仲有一對「王子兄弟」!大家千祈唔好以為Binlo子文打錯字,真係「王子」嚟,講緊嘅係新一季一齊効力日之泉JC晨曦嘅年輕門將,阿哥王子謙同細佬王子聰!

呢對「孖寶兄弟」雖然年紀輕輕,但來頭一啲都唔細!阿哥「子謙」係大專界鋼門,幫理工大學兩度稱霸大專盃;細佬「子聰」更貴為「全港學界精英賽」MVP,以兩人實力,來季絕對幫到晨曦解「冇門」之急!事實上,來季甲組隊增至12隊,令本地球員需求大增,隨住上季正、副選門將張春暉同張景驊離隊,晨曦喺為新季組軍嗰陣,一度為龍門人選頭痛。好彩喺青訓總監盧國華建議下,會方決定將青年軍主力門將「子聰」提升上甲組,另再由標準流浪羅致「子謙」,順利解決門將荒問題之餘,亦造就兩兄弟同時幫一支甲組守龍嘅佳話。

子謙對細佬又愛又妒

話說「王子兄弟」雖同為「英華仔」,但際遇卻係「天同地」!早幾年畢業嘅「子謙」身處英華足球黑暗時期,球隊一直喺學界最低組別Division 3作賽;但「子聰」就係英華黃金一代,今屆幫學校贏全港學界精英賽冠軍,自己仲攞埋MVP。難怪「子謙」都話有啲妒忌細佬:「佢好幸福,喺一個最好嘅環境成長,咁早就有球會賞識打甲組;但我擔心佢一切來得太易會出事,始終守門員要經歷挫折先會成長!」簡單幾句話,睇得出「子謙」好關心細佬,兩兄弟感情唔錯喎!

子聰兩年內超越阿哥

據講,晨曦會方喺「孖張」門將離隊後,一度有意羅致一名國援龍門,但依家簽入呢對「王子兄弟」,或者會令相關計劃擱置,當然一切要睇兩兄弟嘅表現啦!對於新一季嘅展望,「子謙」就話:「老實講,無論係身形同埋天分,細佬都比我好,佢只係差啲經驗,我好希望佢可以成為港甲一線門將。」「子聰」亦定下兩年大計:「今季我先喺後備席累積經驗,希望下季初有得落場,再過半季就超越阿哥!」各位球迷,嚟緊球季記得為「王子兄弟」打氣喇!

王子聰

年齡:18歲

身高/體重:1米80/63公斤

威水史:

2013年全港學界精英賽冠軍、MVP(英華)

王子謙

年齡:23歲

身高/體重:1米74/75公斤

威水史:

2010年甲組聯賽冠軍(傑志)

2010、11年大專盃冠軍(理大)

波經所提供之資訊概以較新版本為準,並已力求精確可靠,但不保證絕對無誤。
資料只供參考用途,如有錯漏而導致閣下蒙受損失,本公司概不負責。