C朗拿度重金打造完美人生！呢位靚仔球星雖然早前先獲頒金球獎、再啱啱領過大十字勳章，但名成利就嘅佢似乎仍然唔心足，為咗整靚棚牙，C朗居然豪使大筆金錢包起指定牙齒矯正科醫生嘅機票食宿，更盛傳向女友伊蓮娜送上近80萬港元嘅名錶，作為今年內結婚嘅訂婚信物，實行用「銀彈政策」塑造圓滿人生！

為咗擁有完美笑容，唔少人都會使萬零二萬蚊港紙箍番靚棚牙，不過C朗作為全球最頂尖球星，整牙當然要整得有霸氣啦！西班牙《真理報》指，C朗拿度早前以包機票食宿為條件，邀請居於美國嘅葡萄牙籍牙齒矯正科名醫斯坦利，去到西班牙幫佢進行牙齦線對稱整形手術，等棚牙更整齊美觀。

據講呢項手術嘅費用，一般都係每隻牙100至120歐元（約1,050至1,260港元），但因為C朗用咗啲特別物料，費用即刻暴增至每隻牙700歐元（約7,350港元）！唔止咁，佢仲豪花6,000歐元（約63,000港元）叫牙醫幫佢整咗個隱形箍牙套，每兩個禮拜覆診嘅費用更係另計，不過對每年收入以千萬歐元計嘅C朗嚟講，用幾日人工整番靚棚牙，絕對係超值。

C朗近排威盡球壇，除咗成為應屆金球獎得主外，佢日前亦都正式去到葡萄牙貝倫宮，接受葡萄牙總統席爾瓦頒授大十字勳章，風頭一時無兩。西班牙《ABC》更爆料指C朗鐵定喺2014年內迎娶女友伊蓮娜，消息指佢早喺金球獎頒獎禮前，已經向未來老婆奉上一隻價值75,000歐元（約78.7萬港元）嘅限量版名錶作為訂婚信物，非常有誠意！該報指兩人計劃去到距離C朗家鄉馬德拉島僅50公里嘅聖港島舉行盛大婚宴，同親朋好友度過人生最重要時刻。