獲新合約有望留低
2022/05/04
丹尼施巴路斯翻生
皇馬拎完西甲冠軍後，依家全力向歐聯冠軍進發，佢哋今季多位球員有出色表現，連中場丹尼施巴路斯都神奇翻生，頻頻獲得上陣機會，據報球會正考慮向佢開出新合約。
成為安帥輪換人選
丹尼施巴路斯對上兩年被外借去阿仙奴，今季原本諗住留隊大展拳腳，點知夏天出戰奧運男足重傷。不過自從踏入2022年後，丹尼施巴路斯重拾狀態，成為主帥安察洛堤嘅輪換人選，今年已經12次為球隊上陣，包括3場歐聯後備入替，上場贏愛斯賓奴嘅「封王戰」，更加首次踢足90分鐘。
據西班牙《馬卡報》報道，丹尼施巴路斯同皇馬嘅合約出年夏天就完結，安察洛堤近期相當滿意佢嘅表現，打算同佢續約，但丹尼施巴路斯先要接受「輪換」角色，始終皇馬中場仲有莫迪歷、卻奧斯、卡馬雲加同費達歷高華維迪等猛將，要喺佢哋身上搶贏正選，唔係一件易事。