梳巴湯馬士搭棚工人變國腳
2022/05/29
哈特斯菲爾德距離英超只有一步之遙，球隊有現時成績，主將梳巴湯馬士（圖）功不可沒，呢位23歲中場原來16個月前仲做緊搭棚工人，估唔到依家有機會爭英超席位，下月初更要為威爾斯爭奪世盃決賽周入場券，迎戰人生最重要兩場比賽。
加盟哈特斯人生轉捩點
梳巴湯馬士曾於韋斯咸青年軍受訓，但被指資質有限，不獲留用。其後佢轉投英格蘭第5級聯賽球隊波利咸，需要做兼職幫補收入，包括做過搭棚工人，直至去年1月加盟哈特斯菲爾德，成為人生轉捩點，今季躍升成為主力，各項賽事上陣50場，攻入3球及交出16次助攻，上年9月更入選威爾斯國家隊。
威爾斯將於6月5日踢世盃外圍賽附加賽決賽，同蘇格蘭對烏克蘭嘅勝方，爭奪1個決賽周席位，換言之短短1星期，梳巴湯馬士要面對兩場生死戰。
咁都未夠戲劇性，梳巴湯馬士早前受傷幾乎收咧，最終趕及季尾復出，奇迹一次又一次發生喺佢身上；哈特斯菲爾德能否升上英超，威爾斯有冇得踢世界盃，就要睇呢位「奇迹之男」表現喇！