諾域治簽森巴新兵耳目一新
2022/07/28
諾域治上季排英超包尾降班，呢隊「升降機」已習慣喺英超同英冠之間上上落落。會方今夏斥資600萬鎊收購聖保羅進攻中場加比爾沙拉，對於升班資格志在必得，好可能又會迅速反彈，1年之後英超見。
諾域治多次表演喺英超同英冠之間彈出彈入，例如2014/15年球季降落英冠，該季最後贏出附加賽，獲得英超席位，但只係踢咗1季英超又降班。最值得留意莫於過去4季，諾域治兩次以英冠冠軍身份升英超，但亦兩次以英超包尾降班，將「升降機」演繹得淋漓盡致。
沙拉搭迪姆普基有睇頭
諾域治新一季繼續由甸恩史密夫執教，呢位51歲主帥上季中途臨危受命領軍，未能協助球隊護級成功，情有可原。甸恩史密夫趁休季期間重建球隊，預料會令人耳目一新。特別係簽入23歲巴西新星加比爾沙拉，可望提升中場進攻組織力，加上射手迪姆普基仍然留隊，呢位芬蘭國腳上季英超入11球，踢英冠超晒班。
事實上，迪姆普基曾經兩次協助諾域治升上英超，有晒爭升班經驗。睇番迪姆普基之前踢兩季英冠合共轟入57球，諾域治有佢在陣，無疑係升班熱門分子。