3度出價！車仔8億搶科芬拿
2022/08/14
車路士今夏一直追逐李斯特城中堅韋斯利科芬拿，但之前兩次提出報價，都被「狐狸兵團」拒絕，不過英國傳媒指車仔並未氣餒，近日更第3度出價，打算以8,500萬鎊（約8億港元）搶人，如果最終達成交易，即打破3年前曼聯以8,000萬鎊收購哈利馬古尼嘅紀錄，令韋斯利科芬拿成為史上最高身價後衞。
有望破馬古尼紀錄
今夏車仔放走兩位中堅魯迪格及安達斯基斯坦臣，領隊杜曹急需要補充後防實力，除咗已簽入高列巴尼之外，亦睇中現年21歲嘅韋斯利科芬拿。據悉車路士之前分別提出6,000萬鎊及7,000萬鎊收購呢位法國新星，但李斯特城都不為所動，所以車仔準備加碼至近8,500萬鎊。
然而，李城領隊羅渣士表示，唔知道車仔最新報價，並強調無意出售韋斯利科芬拿，似乎暗示仲想車仔再加碼。