今夏重返祖雲達斯嘅法國中場保羅普巴，早前就3月曾被綁架勒索而報警，向哥哥馬特斯普巴提出指控，近日馬特斯普巴已經自首，認真峰迴路轉。
馬特斯普巴上月喺社交網拍片宣布，即將揭露細佬保羅普巴「爆炸性」嘅黑歷史，內容疑牽涉向另一法國巨星基利安麥巴比落降頭。保羅普巴隨後發聲明反擊，報稱被持槍匪徒禁錮兼勒索1,100萬鎊，並且已經報警，警方亦鎖定匪徒為馬特斯普巴同佢4名朋友，據報馬特斯普巴已經自首，其餘4位同黨亦被捕，事件細節將於之後公布，馬特斯普巴敲詐不成仲要面臨牢獄之苦，呢段兄弟鬩牆嘅鬧劇應該畫上句號。
