高盧雄雞唔齊腳00後擔大旗
2022/09/22
「高盧雄雞」法國今晚對奧地利有多位主力缺陣，不過亦係一班「00後」上位好時機，主帥迪甘斯或會派遣曹亞文尼、卡馬雲加及威廉沙列巴等新星擔大旗，為球隊接班作準備。
曹亞文尼卡馬雲加孭起中場
法國前中後三線都有主力因傷缺陣，好在幾位新星近期都有出色表現，當中以22歲中場曹亞文尼最搶鏡，呢位身價達1億歐元嘅猛將，加盟皇馬後旋即成為主力，上仗西甲馬德里打吡瞻前顧後，並貢獻一次美妙助攻。喺普巴同簡迪缺陣下，呢位「新韋拉」預料會被委以重任，成為中場新領軍人物，同樣效力皇馬嘅19歲中場卡馬雲加亦有望擔正，組成「銀河防中」。
至於21歲中堅威廉沙列巴今季喺阿仙奴亦有精彩演出，佢唔止防守穩陣，助攻能力亦強，英超開季7輪射入兩粒，隨時成為法國嘅「秘密武器」。