哨牙蘇「彈出彈入」想重返歐洲
2022/09/22
今夏約滿離開馬體會嘅蘇亞雷斯，兩個月前先重投母會蒙特維多國民隊，但話咁快又準備走人，據悉呢位35歲烏拉圭前鋒希望喺11月世盃舉行前，加盟歐洲球會，曾經傳出有意簽佢嘅馬賽及阿士東維拉，隨時成為「哨牙蘇」下一站落腳地。
蘇亞雷斯今年7月底加盟蒙特維多國民隊，亦有唔錯表現，上陣8場射入4球，但雙方只係簽短期合約形式，會方亦早就事先聲明，叫球迷唔好對蘇亞雷斯有太大期望，因為佢隨時會離隊。
馬賽維拉對佢有興趣
事實上，呢位烏拉圭國腳始終心繫歐洲聯賽，所以打算合約屆滿後再戰歐洲球壇。由於自由身球員唔受轉會窗限制，所以「哨牙蘇」仲有機會趕及喺11月世盃舉行前，搵到歐洲球會落班，當中馬賽及維拉就曾經傳過對佢有興趣，佢本人亦想透過高水平賽事，提升狀態為烏拉圭出戰世盃。