艾華利斯入波助攻一樣掂
2022/11/11
曼城英聯盃以2比0擊敗車路士，今季新加盟嘅祖利安艾華利斯又入波，呢位22歲阿根廷國腳近3場比賽創造5個入球，包括射入3球及2次助攻，風頭直逼「人氣王」隊友艾寧夏蘭特；主帥哥迪奧拿表示，兩位射手都咁弗，將來可望同時擔任正選。
阿根廷爭標秘密武器
祖利安艾華利斯入「城」初期多數屈居後備，由於艾寧夏蘭特早前受傷，佢終於有機會擔正，近3場都有波入，今季各項賽事上陣19次入7球及2次助攻，表現出色。哥迪奧拿非常滿意呢位新星表現：「祖利安艾華利斯加盟後入咗唔少波，夏蘭特完全傷愈之後，我認為兩人可以共存。」根據哥帥意思，應該打算用夏蘭特同祖利安艾華利斯合作踢雙箭頭。
另外，祖利安艾華利斯有份入選阿根廷出戰今屆世盃嘅初步名單，以佢近期出色表現，勢成阿根廷爭冠秘密武器。