修咸頓望冬窗前簽兩前鋒
2023/01/31
修咸頓目前喺英超排包尾，降班危機深重，20場聯賽只入17球嘅疲弱鋒力係戰績沉淪原因，領隊尼敦鍾斯喺英聯賽4強次回合前，公開「求救」話修咸頓需要前鋒，據報球會亦全速做嘢，希望喺冬季轉會窗完結前簽入兩名前鋒。
傳熱刺已同意放莫拉
修咸頓1月份相當積極，包括簽入克羅地亞翼鋒米斯拿夫柯錫同阿根廷中場卡路士艾卡拉斯，但主帥尼敦鍾斯表示：「我哋要一個正前鋒，或者一個可以出任前線唔同位置嘅球員，球隊前場需要製造更多機會，我哋仲有時間去實現轉會計劃。」
據報修咸頓想簽入兩名新前鋒，包括用2,000萬歐元（約1.7億港元）收購雷恩翼鋒蘇尼馬拿，另外亦打熱刺嘅巴西前鋒盧卡斯莫拉主意，消息指熱刺已經同意畀盧卡斯莫拉自由轉會，但新球會要負責佢15萬周薪人工。