卡斯米路缺陣打擊紅魔？
2023/02/10
曼聯今季成績急速起飛，領隊坦哈格嘅功力已獲肯定，其實巴西中場卡斯米路先係隊中「靈魂」，佢尋日停賽之下，球隊喺主場只能夠逼和對手，數據顯示「紅魔鬼」喺卡斯米路上陣同缺陣下，成績判若兩隊。
失球數字大幅暴升
據Opta數據顯示，卡斯米路今季英超13次正選上陣，曼聯平均每場拎到2.3分，場均失球只有0.7球，但曼聯喺佢做後備或缺陣嘅聯賽，場均只係拎得1.4分，平均失球數字就暴升至2.1球，而佢嘅3場英超波監仍有兩場未執行。
曼聯名宿堅尼表示：「有時你要等到一個球員缺陣，先會明白佢有幾重要，偉大球員可以令賽事進展更加順利。卡斯米路係一位好重要嘅球員，我哋睇到曼聯冇咗佢會變成點，呢啲就係偉大球員嘅影響力。」