曼城喜鵲8億鬥搶基華拉斯基利亞
2023/02/21
拿玻里今季喺意甲同歐聯大放異彩，一對進攻孖寶域陀奧森漢同基華拉斯基利亞係主要原因，前者早係各大豪門收購目標，但上年夏天先由格魯吉亞聯賽登陸意甲嘅基華拉斯基利亞，已經被球迷冠以「基華拉當拿」綽號，指佢同馬納當拿一樣咁好波！
「基華拉當拿」升價10倍
拿玻里季前用1,000萬歐元（約8,370萬港元）收購基華拉斯基利亞，呢位22歲翼鋒依家已有12個入波同14次助攻，盛傳英超雙雄曼城同紐卡素都想挖角，報道指拿玻里叫價達到1億歐元（約8.37億港元），係球會上年買佢費用嘅10倍，而且仲有價有市。
基華拉斯基利亞經理人祖希利近日透露：「有好多間球會想簽基華拉斯基利亞，但佢依家唔會諗轉會，只係集中幫拿玻里爭意甲同歐聯。基華拉斯基利亞深愛拿玻里，佢同我講明就算轉會亦唔會踢其他意甲球隊，喺意大利佢只會效力拿玻里。」