易帥觸礁李城搵奧尼爾救亡
2023/04/11
李斯特城月初將羅渣士炒魷後，聘請新帥計劃處處碰壁，繼邀請樸達執教「食檸檬」之後，斟介前列斯聯領隊馬殊嘅計劃亦喺最後時刻觸礁，據報李斯特城已轉移目標，考慮請甸恩史密夫或者前領隊馬田奧尼爾回巢。
李斯特城近日同馬殊斟介已經進入最後階段，盛傳雙方將會簽一份3年合約，不過媒體爆料，指雙方最終喺關鍵條款未能達成共識，馬殊對李斯特城嘅長遠發展計劃亦有疑問，所以合作最終拉倒。
有望相隔23年回巢
李斯特城希望下場聯賽作客曼城前有新領隊上場，依家正接洽曾執教維拉嘅甸恩史密夫，同喺1995年至2000年曾執教李城嘅馬田奧尼爾，亦有望相隔23年後回巢。李斯特城上場護級大戰輸畀般尼茅夫後，依家排喺聯賽尾2位置，降班威脅非常嚴重。