紅軍破紀錄力斟 卡些度耍手揀上車
2023/08/12
新季英超今晚展開前，轉會市場風起雲湧，利物浦突然以破英超轉會費紀錄力斟摩西斯卡些度，不過呢位白禮頓中場竟然「耍手」，話只會揀加盟車路士；熱刺則答應拜仁慕尼黑嘅出價，哈利卡尼完成體測就會正式過檔；衞冕嘅曼城亦準備提高至接近1億鎊開價，希望韋斯咸嘅盧卡斯柏基達來投。
卡尼做埋體測就過拜仁
英國多間傳媒尋日爆出猛料，利物浦已經同白禮頓達成協議，同意以1.1億鎊（約11億港元）羅致防守中場摩西斯卡些度，打破車仔安素費南迪斯嘅紀錄（1.07億鎊），成為英超史上最貴轉會。但之後發展峰迴路轉，正身處倫敦嘅卡些度，向傳媒透露佢本人唔想過「紅軍」，只會選擇加盟車仔，令交易增添變數。
至於擾攘多時嘅哈利卡尼轉會終於步入結局，熱刺日前接受拜仁1.2億歐元（約10億港元）嘅出價，呢位英格蘭國腳都同拜仁傾掂簽約4年，雖然尋日有消息指熱刺唔畀卡尼上機去德國，但球會隨後澄清屬假消息，只待卡尼完成體測就成事，據聞周薪高達41.5萬鎊（約415萬港元），除咗人工高，佢轉戰德甲甚有機會拎到足球生涯首冠，都係離隊原因。
同時間「3冠王」曼城繼續增兵，雖然第二次開價8,400萬鎊（約8.4億港元）收購盧卡斯柏基達，被韋斯咸拒絕，但呢位巴西國腳表明想轉投曼城，巴西媒體指韋斯咸目標係1億鎊，相信曼城都會「豪」畀佢。領隊哥迪奧拿喺開鑼戰前就拒絕評論：「我可以答基爾獲加嘅事，但唔會講柏基達，佢依家仲係韋斯咸球員。」