天才墮落又關C朗事
2023/09/15
查頓辛祖兩年前以7,300萬鎊轉會費加盟曼聯，原本被視為球隊未來核心，可惜呢位天才新星喺奧脫福發展未如人意，同球會高層或隊友都結下唔少恩怨，當中包括C朗嘅重返最關鍵。
有外國傳媒報道，指查頓辛祖加盟後冇幾耐，C朗突然回歸成為呢位英格蘭翼鋒嘅噩夢開端；曼聯原本應承畀辛祖嘅7號波衫，以及成為進攻核心嘅角色，一次過轉移咗畀C朗。蘭歷克接替蘇斯克查執教後，C朗更曾要求蘭歷克由433改踢442，變成一個將辛祖棄用嘅陣式，不過蘭歷克當時拒絕遷就，認為陣式會影響辛祖場上發揮及狀態。
亂爆病情成導火線
一直撐查頓辛祖嘅蘭歷克最終離職，新上任嘅坦哈格主張鐵腕管治，對辛祖紀律問題頗有微言；據報辛祖因為經常遲到，坦哈格曾經特意將辛祖嘅訓練安排提早1個鐘開始，最初雖見成效，但久而久之又故態復萌。另外，有指辛祖上季出現心理問題，需要睇心理醫生，但坦帥未得辛祖同意下公開病情，令雙方關係惡化。