阿仙奴出手截劫利物浦獵物
2023/10/19
英超勁旅阿仙奴近年鍾情巴西兵，巴西籍總監伊度係重要原因，呢位阿仙奴高層近日趁國際賽期飛返巴西訪問多間球會，日前就現身喺富明尼斯，有消息指佢睇中22歲中場特林達迪，準備喺利物浦手上搶簽呢位巴西新進國腳。
有份入選巴西最新一期大軍名單嘅特林達迪，原本夏天有機會加盟利物浦，但富明尼斯拒絕季中放人，有傳利物浦會喺一月再度出手，不過巴西傳媒爆阿仙奴已加入戰團，而且特林達迪合約內設有買斷條款，轉會費約2,150萬鎊（約2.15億港元）。
總監伊度現身富明尼斯
傳聞曝光後，阿仙奴總監伊度日前又喺富明尼斯現身，呢支巴甲勁旅官方社交網亦貼出伊度到訪相片，伊度大讚球會嘅青訓設備，唔少球迷都指伊度此行「點止參觀咁簡單」。伊度喺2019年做阿仙奴總監前，曾經喺哥連泰斯同巴西國家隊擔任過技術官員。