紅軍睇中森巴新星頂VVD
2023/11/14
據英國傳媒爆料，利物浦已經派人飛赴巴西，接觸巴甲球隊聖保羅中堅盧卡斯貝拉度（圓圖），邀請佢加盟。呢位19歲新星潛力優厚，紅軍可能視佢為32歲老將華基爾雲迪積克（VVD）嘅接班人。
貝拉度身價達1.9億
利物浦領隊高普有意簽入一位中堅，會方近幾個月一直關注盧卡斯貝拉度表現，上星期更加派人接觸佢，利物浦希望盡快同聖保羅達成交易協議，令盧卡斯貝拉度可以喺明年一月轉會市場重開之後，正式加盟紅軍，估計轉會費為2,000萬鎊（約1.9億港元）。
身高1米86嘅盧卡斯貝拉度今季各項賽事為聖保羅上陣43場入1球，利物浦兩位中堅華基爾雲迪積克、祖爾麥迪比都已經年屆32歲，簽入盧卡斯貝拉度有助改善防線老化問題。