周薪加30萬 利誘里安拜尼續約
2024/01/06
阿士東維拉今季成績出色，排英超第2位，僅落後榜首利物浦3分，翼鋒里安拜尼功不可沒，里安拜尼2021年夏天以2,500萬鎊（約2.5億港元）轉會費，由利華古遜加盟阿士東維拉後，今季表現大爆發，踢18場聯賽已經入6球及5次助攻，引來唔少大球會注意，維拉計劃提早開出「肥約」同呢位26歲牙買加國腳續約。
里安拜尼只剩下1年半合約，維拉希望盡快同佢續約，里安拜尼現時周薪為10萬鎊（約99萬港元），如果佢續約，應可獲得13萬鎊（約129萬港元）周薪，加薪3萬鎊（約30萬港元），同門將達米安馬天尼斯、前鋒奧尼屈堅斯、中堅泰朗明斯等隊內高薪一族睇齊。里安拜尼表示：「好開心球隊位於正確軌道上，希望盡力為球隊比賽，獲得最佳成績，維拉幾時需要我，我都會喺度。」言下之意佢應該好大機會同意續約留隊。