羅馬官宣！「寸王」被炒有望重返英超
2024/01/17
意甲羅馬尋日官方宣布，主教練摩連奴及其教練團隊離任，即時生效，盛傳名宿迪羅斯將回巢接掌教鞭。「寸王」喺「雌狼」2季半執教生涯告終，關於佢下一站去向傳聞四起，曼聯、車路士、紐卡素，甚至巴西國家隊都有可能。
連續教9隊都捱唔過3季
羅馬會長丹佛烈金在官網發文：「我代表羅馬全體成員感謝荷西（摩連奴）來到羅馬後嘅熱情和奉獻，將永遠懷念佢執教，但我認為，為球會最佳利益必須立即做出改變，祝福荷西同佢嘅團隊未來一切順利。」羅馬係摩連奴第9支執教球隊，同過去8支球隊包括車路士兩次任期在內，每隊執教年期都過唔到3季，因此佢又被稱為「摩3季」。
意大利傳媒報道，摩連奴被炒導火線係羅馬近期成績不穩，意大利盃出局及上仗1比3不敵AC米蘭，聯賽跌至第9，不過「寸王」多次暗示球隊唔肯加大投資，因而觸怒高層導致決裂，而且摩連奴同羅馬合約於今季完結，依家只係提早半季分手。