沙維攬實「萬能」沙治羅拔圖
2024/01/19
巴塞隆拿持續受到財政問題困擾，唔少老將面臨被清洗，季尾約滿嘅沙治羅拔圖盛傳會被放棄，不過教練沙維近日公開要求巴塞隆拿同佢續約，確保呢位隊長下季繼續留隊。
公開要求巴塞留人
31歲嘅沙治羅拔圖今季淪為後備，不過近期傷兵滿營下，做「替工」有唔錯表現，沙維日前表示：「我會建議球會同沙治羅拔圖續約，佢對球隊好重要，可以踢多個位置，我唔需要同佢解釋太多戰術，佢已經好熟悉巴塞隆拿。沙治羅拔圖係個自我要求好高嘅人，永遠付出100%，我好滿意佢嘅表現。」
巴塞青訓出身嘅沙治羅拔圖，之前為同球會共度時艱，依家年薪500萬歐元已經係隊中低薪一族，但消息指巴塞隆拿仍會要求沙治羅拔圖再減薪，甚至拎最低工資留隊。