「林伯」有望回歸車路士教女足
2024/02/12
車路士領隊普捷天奴近期被傳帥位不穩，摩連奴、迪薩比、沙維等名帥都傳聞係候選接任人，最近更有消息指「藍戰士」傳奇林柏特（圖右）將會回歸，不過今次「林伯」就唔會係「肥普」嘅代替者，而係執教車路士女足！
車路士女足殿堂級主帥希耶絲，5月份就會結束12年嘅車路士女足執教生涯，擔任美國女足主帥。據英國傳媒報道，「車仔」正物色新帥，其中一個目標就係球會傳奇林柏特。雖然「林伯」冇執教女足經驗，但佢對車路士上下瞭若指掌，被視為合適人選。
前三獅女國腳力撐
林柏特執教愛華頓嗰陣，曾經同佢共事嘅前英格蘭女足國腳基絲甸臣表示：「林柏特對車路士好熟悉，根據我同佢嘅接觸，林柏特嘅性格同溝通能力好適合執教車路士女足，唔應該根據性別去揀人，男人一樣可以教女足。」