哥林威爾遜開刀抖3個月
2024/02/18
英超球會紐卡素今季飽受傷兵問題困擾，上場聯賽3比2贏諾定咸森林一仗，復出後首次擔正嘅哥林威爾遜又再受傷，「喜鵲」證實呢位前鋒將做手術治療胸部傷患，預計要抖9至12個星期，今季隨時提早收咧。
季尾約滿緣盡喜鵲？
哥林威爾遜今季已因小腿同大腿筋傷患缺席咗11場比賽，上仗對森林係佢養傷1個半月後首次正選，結果同對手相撞重創離場。經檢查後，發現哥林威爾遜右邊胸肌至膊頭附近位置受傷，而且需要開刀，休養期可能長達3個月。
31歲嘅哥林威爾遜今季英超16次上陣入7球，效率極高，可惜未能長期保持健康，由於佢同紐卡素嘅合約到季尾完結，暫時亦未有續約聲氣，盛傳呢位英格蘭前鋒可能會自由轉會，意味佢未必再有機會披起紐卡素波衫比賽。