「大巴黎」反攻8.5億搶曹亞文尼
2024/03/05
巴黎聖日耳門（PSG）前鋒基利安麥巴比季尾自由身離隊，將會加盟皇馬已經係「公開秘密」。傳媒指PSG正準備展開「反攻」，趁住皇馬斥巨資簽麥巴比，準備搶皇馬中場曹亞文尼（圖）。
麥總太貴賣人套現
皇馬簽「麥總」名義上係「自由轉會」，但實際上喺簽字費（1.5億歐元）、巨額人工（1,500萬歐元年薪）同肖像權分帳等開支，皇馬將會付出至少2.25億歐元（19.1億港元），對財政構成一定壓力。傳媒指皇馬表明無意出售陣中前鋒，意味中後場將會係「套現」首選。
消息指「大巴黎」已睇中皇馬中場曹亞文尼，呢位24歲法國國腳今季贏得安察洛堤信任，但並唔屬於「非賣品」，PSG相信動用1億歐元（約8.5億港元）轉會費，可以說服皇馬放人。