科頓勢破謝拉特神級紀錄
2024/04/17
曼城中場菲爾科頓今季頻頻射入世界波，包括歐聯8強首回合作客皇馬，怒轟死角入網，令人拍案叫絕。根據OPTA統計，呢位23歲英格蘭國腳近5次歐聯擔任正選，都取得入球，追平謝拉特嘅紀錄。換言之，曼城次回合主場鬥皇馬，科頓只要正選上陣入波，就可以成為歐聯史上，最長正選連續入波嘅英格蘭球員。
近５次歐聯擔正必有士哥
菲爾科頓今屆歐聯並非每場踢正選，近5次歐聯擔正，包括分組賽兩次對ＲＢ萊比錫、主場對年青人、16強首回合作客哥本哈根、8強首回合作客皇馬，佢都各入1球，同2007/08年球季利物浦神奇隊長謝拉特睇齊，成為歐聯最長正選連續入波嘅英格蘭球員之一。
菲爾科頓今季腳風極順，各項賽事上陣45場入22球及10次助攻，隊友奇雲迪布尼話：「科頓係我合作過嘅最有天賦球員，佢可以喺未來15年改寫足球歷史。」由於射手艾寧夏蘭特經常大戰失準，科頓成為曼城爭取衞冕歐聯關鍵人物。