藍月球迷玩謝貝拿度
2024/04/19
曼城喺歐聯8強互射12碼出局，宴客嘅貝拿度施華慘成罪人，不過唔少人認為真正罪魁禍首，係一名「玩嘢」嘅曼城球迷，影響貝拿度射門質素，而該「玩嘢球迷」就成為全球曼城粉絲聲討目標，直指佢係曼城歐聯出局嘅罪魁禍首。
收埋個波40秒影響射門質素
曼城喺第1輪12碼本來領先，莫迪歷射失後一腳將個波抽上看台，不過一位着住曼城波衫嘅球迷一直唔肯交番個波出嚟，貝拿度等待期間攤大雙手表現唔耐煩，最終擾攘咗近40秒先拎番個波嚟射，而貝拿度射中間被盧連接實。
曼聯名宿里奧費迪南指：「40秒聽落唔係好耐，但身處嗰個環境其實係好長時間，你會諗要唔要改變射法？改變角度？最後佢射出一個冇力嘅波。」