恨教紅軍施洛盼飛燕諾放行
2024/04/27
利物浦鎖定荷蘭教練施洛（圖）做高普接班人，斟介正進行得如火如荼，呢位45歲教頭喺日前接受訪問，公開表示希望成為利物浦新領隊，呼籲飛燕諾同「紅軍」達成協議。據報利物浦有望喺今個周末落實施洛下季接任。
飛燕諾喺作客伊高斯前，施洛對利物浦斟介公開表示：「兩間球會傾緊，我正等待結果。我想教利物浦唔係秘密，依家等球會傾掂，我好有信心。」飛燕諾未受施洛有意離隊消息影響，3比1擊敗伊高斯後續排第2位，落後榜首燕豪芬9分。
施洛賽後再次強調想教利物浦：「我喺飛燕諾有美好時光，但有機會加盟利物浦，只有癲佬先會拒絕！」報道指利物浦首次開價800萬歐元被飛燕諾拒絕，預計「紅軍」只要加碼到1,000萬歐元，飛燕諾就會答應畀施洛過檔。