贖身價僅4.9億米高奧利斯勁搶手
2024/05/08
水晶宮大炒曼聯，翼鋒米高奧利斯梅開二度，表現光芒四射。據傳媒爆料，呢位22歲新星嘅解約條款今夏生效，其他球會只要出5,000萬鎊（約4.9億港元）解約金，就可以買斷佢，難怪獲多間豪門垂青。
對「紅魔」梅開二度
米高奧利斯2021年夏天由雷丁轉投水晶宮，表現愈來愈好，上年4月對列斯聯更成為英超史上最年輕助攻「戴帽」球員，當時已傳出獲車仔及拜仁睇中。雖然奧利斯今季經常受傷，僅喺英超上陣17次，但仍射入9球及4次助攻，創下職業生涯單季最多入波紀錄。
早前傳出曼聯、阿仙奴、曼城及利物浦想要奧利斯，英國傳媒指紐卡素亦加入爭奪，雖然呢位翼鋒上年8月先同水晶宮續約4年，但解約條款今夏生效，據悉佢都想踢歐聯，即係阿仙奴、曼城同利物浦佔得先機。