艾達臣眼眶骨折今季收咧
2024/05/18
英超榜首勁旅曼城前日宣布，門將艾達臣摩拉斯喺上場聯賽對熱刺受傷，檢查後發現眼眶骨折，今季最後2場賽事都肯定唔可以上陣。曼城喺英超煞科戰對韋斯咸贏波就捧盃，之後英足盃決賽有望成為「雙冠王」，但艾達臣就無緣參加呢2場冠軍戰。
料趕及美洲盃復出
艾達臣喺對熱刺一仗，被基斯甸羅美路撞傷，被換走嗰陣一度大發脾氣，但原來呢位巴西國腳傷勢嚴重，眼眶受傷出現骨折，曼城聲明證實：「今次傷患令艾達臣唔能夠參加今季餘下賽事。」艾達臣早前亦入選巴西嘅美洲盃大軍名單，預計可以趕及康復。
喺艾達臣受傷下，曼城將會再次重用2號門將史堤芬奧迪加，呢位德國球星今季表現穩健，曼城球迷應該唔使太擔心。