沙加離廠即捧盃破3大紀錄
2024/05/20
阿仙奴前隊長格列沙加（圖）上年夏天離開「兵工廠」之後，加盟利華古遜僅1季，就獲得聯賽錦標，並一次過打破德甲三項紀錄，證明想捧盃，選擇效力嘅球隊比努力更重要。
傳球觸球德甲史上最多
格列沙加2016至23年效力阿仙奴，只捧過2次英足盃冠軍，轉投利華古遜後，唔止提早奪得德甲冠軍，仲有望贏埋德國盃及歐霸盃冠軍，隨時1季奪冠次數，仲多過效力「兵工廠」7年總和。
呢位31歲瑞士國腳係組織傳送方面，對球隊作出重大貢獻。據統計顯示，格列沙加今季聯賽上陣33次，嘗試傳球3,259次、成功傳球3,003次、觸球3,648次，三項數據都打破單季德甲紀錄。沙加仲射入3球，可以話係攻守兼備，利華斥資2,500萬歐元收購年過30嘅格列沙加，曾遭到唔少質疑，但事實證明係最佳收購。