失冠喊捧盃都喊C朗延續熱血傳奇
2024/06/18
將會紀錄性第6度出戰歐國盃決賽周嘅C朗，坐擁多項歐國盃紀錄，5次參戰都入波更加係前無古人。C朗合共喺決賽周披甲25場射入14球，不論上陣次數及入球，都係史上第1人。
6戰歐國盃史上No.1
由乳臭未乾嘅19歲小子，到年屆39的大男人，C朗於歐國盃經過高低起跌，入過2次決賽。19歲那年，葡萄牙係主辦國，當時穿着「17號」波衫嘅C朗，開鑼戰接應「7號仔」費高開出角球頂入希臘大門，取得首個國際賽入球，但可惜決賽，葡軍仍以0比1不敵創造神話嘅希臘，賽後C朗哭成淚人，要史高拉利安慰。
到2016年，C朗以隊長身份出戰決賽，不過25分鐘就受傷被換出場，心心不忿嘅C朗含淚離場，幸好隊友將士用命，加時以1比0擊敗法國奪冠，C朗喜極而泣。
C朗堅持刻苦耐勞及對自己高要求，先至長期保持良好狀態，今日葡萄牙對捷克，會係佢步入國際賽倒數嘅正式序幕，正如上場鬥愛爾蘭嘅熱身賽後，佢自己坦言：「我踢波嘅日子唔多喇，我要好好享受每一場比賽，踢好每一分鐘」。