獻計提升入球率 屈堅斯︰我拍卡尼打雙箭
2024/06/25
英格蘭喺今屆歐國盃2戰只入2球，領隊修夫基被批評戰術太保守，隊內前鋒奧尼屈堅斯近日接受傳媒訪問期間獻計，認為自己可以同哈利卡尼一齊上陣合組雙箭頭，有助提升「三獅兵團」攻力。
自言作用似熱刺「老孫」
修夫基近兩場歐國盃都排4231陣式，並且11位正選球員不變，但效果欠佳，僅小勝塞爾維亞1比0，打和丹麥1比1，因此「修哥」戰術部署遭受唔少批評，奧尼屈堅斯都出聲，暗示希望變陣，佢話：「我當然可以同哈利卡尼一齊上陣，佢可以稍為墮後攞波，類似10號球員角色，我哋位置及作用並冇重疊，正如哈利卡尼以往同孫興民喺熱刺合作一樣。」
奧尼屈堅斯首場分組賽並冇上陣，上仗等到70分鐘入替哈利卡尼，不過，佢承認並冇向修夫基提出有關建議，因為對方有大把「棘手」問題要處理喎！