大賽入球斷纜C朗躁爆
2024/06/28
葡萄牙意外0比2不敵格魯吉亞，雖無礙首名出線，但一向以鬥心強見稱嘅隊長C朗，始終接受唔到輸波事實，被換走之後，發脾氣怒踢草皮洩憤。呢位39歲前鋒今屆賽事仍然食白果，連續10屆國際大賽（世界盃及歐國盃）分組賽入波走勢斷纜，難怪躁爆。
踢草皮洩憤搵祖達呻
C朗以正選上陣，相信想延續大賽入波紀錄，點知一開波就落後打亂節奏。C朗亦愈踢愈躁，28分鐘喺禁區內遭對手侵犯，球證冇判罰12碼立即激烈投訴，結果被出示黃牌警告。
C朗今場17次觸球，3次射門，1次中目標，65分鐘被換走時候，C朗似乎唔領情，發脾氣怒踢草皮，坐低之後亦表情沮喪，更不斷同身邊隊友迪亞高祖達抱怨。
根據OPTA統計，C朗球員生涯首次喺國際大賽分組賽冇波入，佢由2004年首次參加歐國盃，前5屆分組賽都有入波，加上2006至22年踢5屆世盃分組賽亦有「士哥」，但今屆歐國盃3場分組賽正選披甲都食白果，惟有寄望淘汰賽打破入球荒。