創歷史！哥斯達3連救做英雄
2024/07/03
葡萄牙喺互射12碼3比0淘汰斯洛文尼亞，24歲門將迪奧高哥斯達（圖）成為超級英雄，佢喺12碼階段連續3次撲出對手射門，成為歐國盃史上第1人。
斯洛文尼亞今場靠反擊威脅唔大，全場只有2次中目標，不過第115分鐘就幾乎搞掂，葡萄牙老將比比後場控甩，班捷文施斯高搶走後單刀射門，迪奧高哥斯達僅僅用腳閂出。迪奧高哥斯達喺互射12碼上身，連環撲出伊利錫、巴爾高域同華碧嘅射門，成為歐國盃史上第1個喺互射12碼0失球、同埋撲出3個12碼嘅門將。
「今場係生涯代表作」
效力波圖嘅迪奧高哥斯達賽後表示：「今次12碼我作出改變，跟隨自己嘅預感去救，呢個決定非常好，今場可能係我足球生涯代表作。」對於救番C朗免做出局罪人，佢就話：「每個球員都會犯錯，但最重要係犯錯之後點樣回應。」