![logo](/app/assets/img/logo.png)
輸波輸品!比寧咸怒踢冰箱捱轟
2024/07/16
英格蘭喺決賽飲恨輸波!全世界等睇祖迪比寧咸表演補時入波好戲,但最終並冇出現,賽後呢位21歲中場大發脾氣,怒踢水樽冰箱洩憤。而另一位進攻主力菲爾科頓表現差亦係球隊失利原因之一,呢位24歲曼城球星7場正選0貢獻,成為「三獅兵團」佗衰家。
比寧咸上季西甲多次比賽末段,甚至補時入波,今屆歐國盃16強對斯洛伐克,亦喺補時5分鐘倒掛入波扳平。今場決賽比寧咸貢獻1次助攻,造就高爾彭馬入波扳平,英格蘭86分鐘再次落後,而比寧咸未能再扮演救世主。比寧咸上季協助皇馬捧西甲及歐聯冠軍,如果贏埋歐國盃,就好大機會奪取今年金球獎,但現時可能願望落空,難怪躁爆。
賽後比寧咸既失望又憤怒,喺後備席怒踢水樽冰箱洩憤,有輿論認為比寧咸上季太成功,難以接受失敗,控制唔到情緒,欠缺大將之風,仲未夠班成為新一代球王。
「007」科頓佗衰家
而佢嘅英格蘭隊友菲爾科頓今屆表現差強人意,7場都踢正選,但0入球0助攻,被網民嘲諷係「零先生」、「007」,同上季英超上陣35場入19球及8次助攻,判若兩人。最諷刺係往往換走佢之後,「三獅兵團」就入波,成為佗衰家。