諗住長線投資 紐卡素簽19歲中堅
2024/07/22
紐卡素上周六官宣，簽入19歲塞爾維亞Ｕ17中堅柏華斯，打算作長期培養之用。柏華斯喺奧地利聯賽出道，舊年重返塞爾維亞落班，上月歐國盃期間同紐卡素傾掂數。柏華斯為塞爾維亞Ｕ17上陣35場，可踢右中堅、防中及攻中等位置，多才多藝。
至於紐卡素下個目標據報係車仔翼鋒馬度基，並已接觸「藍戰士」評估轉會可能性。馬度基舊年初由燕豪芬加盟，轉會費2,900萬鎊（約2.9億港元），由於車仔今夏要減輕負擔，因此「喜鵲」趁機出手斟介。
侯域或教三獅 喜鵲斟肥普
此外據英國傳媒爆料，紐卡素領隊艾迪侯域成為英格蘭新帥大熱，報道話「喜鵲」有晒準備，一旦呢位46歲少帥轉教「三獅」，就會搵「肥普」普捷天奴接手。艾迪侯域對教英格蘭心郁郁，並暗示如果紐卡素想佢留隊，就必須有更多話事權：「如果我做得開心，有充足自由度去做嘢，自然唔會諗離隊。」