![logo](/app/assets/img/logo.png)
東尼缺陣傾轉會將轉戰沙特
2024/08/20
賓福特主場對水晶宮一役,王牌前鋒艾雲東尼意外冇份進入大軍名單,領隊法蘭克賽後證實「傾緊轉會」,消息指沙特豪門吉達艾阿里首次開價被拒,雙方正進行商討,預計喺轉會窗關閉前達成共識。
法蘭克:冇佢一樣成功
艾雲東尼只剩1年合約而且拒絕續約,賓福特已準備將佢賣走,法蘭克表示:「東尼依家有好多嘢發生緊,尤其係轉會,所以我哋決定唔使佢踢,依家仍未有任何協議,但希望好快會有。東尼係個神奇球員,但賓福特已證明就算冇咗佢,一樣可以成功。」
據報依家斟介嘅球會係吉達艾阿里,呢支沙特勁旅首度開價3,700萬鎊(約3.7億港元)遭到賓福特拒絕,有傳賓福特索價6,000萬鎊(約6.1億港元),不過雙方仍然繼續商討。28歲嘅艾雲東尼同屋企人亦未為呢次轉會作出最後決定,呢位英格蘭國腳首選係留喺英超,曾經傳出曼聯同車路士都有意「先借後買」艾雲東尼,但最後冇下文。