馬天尼利嘥料搵史達寧頂上？
2024/09/22
阿仙奴今季入球數字偏少，上場歐聯僅同阿特蘭大打和0比0，翼鋒加比爾馬天尼利狀態低迷，被指係最大罪人。根據統計，呢位巴西國腳近17次為「兵工廠」踢正式賽事，冇入波亦冇助攻，被網民嘲諷為「0017」。
場上隱形被嘲「0017」
加比爾馬天尼利曾於2022/23年球季英超上陣36場入15球，被譽為阿仙奴鋒線希望，但今年愈踢愈沉，最近1次為「兵工廠」正式賽事入波，已經係3月英超對錫菲聯，上場歐聯對阿特蘭大，「隱形人」馬天尼利踢足全場只有2次射門兼唔中目標，並錯失1次黃金入波機會，遭英國傳媒口誅筆伐，認為主帥阿迪達係時候收起加比爾馬天尼利，以拯救鋒線。
史達寧自從加盟後，兩次後備上陣開始上力，加上佢曾效力曼城7季，對「藍月亮」底蘊瞭若指掌，所以網民認為阿仙奴今晚對曼城，應該派史達寧擔正倒戈，或會有驚喜。