門將分野!馬天神救威廉王子嗌到失聲
2024/10/04
阿士東維拉喺歐聯創造歷史，阿根廷門將達米安馬天尼斯全場左飛右撲，同樣係贏波大功臣。相反拜仁門將紐亞就因為失位被笠死孭晒鑊，兩位門將命運大不同。
拜仁今場有唔少攻門，不過馬天尼斯全場作出7次撲救，包括上半場托出米高奧利斯嘅曲墜冷箭，補時4分鐘再撲出哈利卡尼近門必入頭槌，著名維拉死忠王儲威廉王子都喺看台上振臂高呼，仲嗌到失聲。
罪仁紐亞死唔認衰
另邊廂，38歲嘅紐亞一向以腳法同組織力強見稱，經常棄關兼任清道夫幫助組織，紐亞賽後否認自己犯錯：「係人都知我場場波都係咁踢，呢個就係拜仁嘅踢法，我哋計算過先敢去冒險。」而維拉領隊艾美利表示：「我哋研究拜仁嗰陣，已經討論過紐亞嘅位置會好出，我亦知道祖漢杜蘭會射門。」