德軍門將冇人才 輪到34歲包文首演
2024/10/14
德國過去十幾年喺紐亞把關下，大門一直都安枕無憂，點知隨住紐亞退役同達史特根重傷，依家要搵人先知原來咁難！德國上場畀紐布爾首演後，今晚輪到迎戰荷蘭，就落實會由34歲嘅包文處子上陣！
達史特根重傷要抖8至9個月，紐布爾同包文就被領隊拿高斯文視為繼任人，上場2比1贏波斯尼亞，上季由拜仁慕尼黑外借史特加嘅紐布爾就首度上陣，但佢就證實對荷蘭會輪到包文把關：「包文有恭喜我，依家輪到我期待佢嘅首演，希望佢有好嘅表現幫德國贏波，我哋一直相處得好好。」
達史特根傷愈仍屬首選
老將包文效力賀芬咸10年，過去曾代表過德國U21隊，不過喺大國腳就苦無機會。據德國傳媒報道，拿高斯文未有打算培訓一名長遠門將人選，一來德國年輕門將選擇唔多，二來佢係然相信32歲嘅達史特根傷愈後，仍會長時間獲得正選。