腳趾骨折冇得抖賴斯忍痛頂硬上
2024/11/10
喺英超同歐聯兩連敗嘅阿仙奴，再傳出傷兵噩耗，據報迪格蘭賴斯喺對紐卡素一仗受傷，檢查後發現腳趾骨折，一度連波砵都着唔到，不過消息指呢位英格蘭中場會「頂硬上」，喺今晚「倫敦打吡」為球隊搏殺。
卡拉科利國際賽期後復出
阿仙奴上場歐聯不敵國米，賴斯因傷缺 陣，當時領隊阿迪達透露：「賴斯上場（對紐卡素）受傷，雖然佢當時踢足全場，但之後覺得唔舒服。」據媒體報道，賴斯證實腳趾骨折，不過由於球隊陷入低潮，今晚火併「車仔」都要忍痛落場打硬仗，而佢亦有份入選新一輪英格蘭大軍名單。
阿仙奴今季傷兵不斷，隊長馬田奧迪加特抖咗兩個月啱啱先復出，依家又輪到賴斯「中招」，加上卡拉科利及富安健洋等「十字兵」，預計要今個國際賽檔期後先復出，人腳掹掹緊。