（Getty Images圖片）
修咸頓上場聯賽淨吞熱刺5蛋後，辭退主帥羅素馬田，暫時由助教西蒙魯斯做看守領隊，據報佢哋已經搵到新主帥，就係上月被羅馬炒魷嘅克羅地亞籍教頭祖歷（圖）。
「轉會專家」羅曼諾報道，修咸頓同祖歷已經達成口頭協議，有望短期內簽約作實。49歲嘅祖歷執教生涯主要喺意大利，先後教過曼托華、克羅托內、熱拿亞、維羅納及拖連奴，今年9月中接替迪羅斯出任羅馬主教練，但到11月初就因成績太曳被炒，轉戰英超接手排榜尾嘅修咸頓，真係祝佢好運。
