艾摩廉第1簽瞄準萊切左閘
2025/01/23
魯賓艾摩廉入主曼聯後成績持續下滑，冬窗快將關閉，曼聯再唔增兵就冇機會，據報艾摩廉第一簽已經有目標，就係萊切左閘柏德列多古。
艾摩廉嘅343體系中，左右翼衞相當重要，右翼衞已經有馬沙拉奧同阿密特迪亞路，但係左閘勞基梳爾長期養傷，杜維爾馬拉西亞雖已復出但狀態不足，現時左翼衞係由右閘達洛治客串，柏德列多古來投將可解決左翼衞問題。
同米蘭雙雄爭柏德列多古
年僅20歲嘅柏德列多古係丹麥新進國腳，今季為萊切上陣22場，取得3入球1助攻數據，去年10月剛續約至2029年，身價估計為2,000萬歐元（約1.6億港元），不過由於拿玻里同米蘭雙雄都對佢有興趣，曼聯想簽佢可能要畀雙倍價錢，轉會費最高可達4,000萬歐元（約3.2億港元）。曼聯同萊切現時仍在斟介階段，不過並未正式報價，如果傾成將會係艾摩廉入主曼聯第一簽。