費倫托利斯轉型 做羅拔佬接班人
2025/04/30
巴塞隆拿首席射手羅拔利雲度夫斯基近期養傷，一度令人擔憂球隊冇中鋒可用，教練費歷克將翼鋒費倫托利斯推前頂替「羅拔佬」位置，效果出奇地好，被指有西班牙經典射手費蘭度托利斯影子，呢位「新費托」成功開拓新出路。
現年25歲嘅費倫托利斯3年前以5,500萬歐元轉會費由曼城加盟巴塞，但大部分時間表現平平無奇。加上新星拉明耶馬冒起，拉芬夏比洛尼加盟後有出色表現，令同樣司職翼鋒嘅費倫托利斯處境更加尷尬。
改踢中鋒交到貨
幸好新帥費歷克擅於用人，嘗試安排呢位西班牙國腳踢中鋒，證明行得通，上場西班牙盃決賽，費倫托利斯84分鐘射入扳平2比2，為球隊爭取到加時機會，最終反勝皇馬捧盃。費倫托利斯今季上陣42場入18球，創職業生涯單季入球新高，「羅拔佬」已經36歲，將來由「新費托」做佢接班人，財政欠佳嘅巴塞又可以慳番一筆。