迪布尼感人告別３碼中楣掃興
2025/05/22
|
|
|
||||||||||||
今場亦係傳奇球星奇雲迪布尼最後一次喺曼城主場亮相，由賽前到賽後都係呢位比利時中場嘅歡送派對，連領隊哥迪奧拿亦感動落淚。美中不足係迪布尼今仗門前3碼對住空門，竟然射中楣，未能用入波告別主場粉絲。
不捨愛將哥迪奧拿眼濕濕
迪布尼今夏約滿，結束「藍月亮」10年光輝歲月，今場係佢最後一次喺主場出戰，曼城專登安排盛大歡送儀式，迪布尼老婆仔女都有入場，看台上亦展示呢位中場大師嘅超巨型海報，當儀式進行期間，哥帥更感動流淚，場面感人。迪布尼賽後發表離隊感想：「我想將歡樂帶畀球迷，踢進攻同具創意嘅足球。過去10年充滿快樂，創造一啲神奇嘅事，令曼城變得更好，呢個過程難以置信又非常快樂。有邊個人可以有5萬人同佢講再見？好多謝大家。」
迪布尼今場本來有機會入波報答球迷，點知佢上半場門前3碼對住空門，竟然射中門楣，呢位老將賽後亦自嘲：「真係好肉酸，冇任何藉口，我個仔一定唔會放過我！」